Prishtina pati paraqitje të mirë në udhëtim te Larne e Irlandës së Veriut. Por, pavarësisht mundësive shumë të mira që pati fituesja e Kupës së Kosovës në futboll, nuk arriti të shënojë. Ndeshja e zhvilluar të enjten mbrëma në “Ballymena Showgrounds” u mbyll pa gola, ndërsa ishte e para e rrethit të dytë kualifikues të Ligës së Konferencës. Dhe skuadra që do të avancojë tutje do të vendoset në Prishtinë, përkatësisht në stadiumin “Fadil Vokrri” në Prishtinë. Ballafaqimi Prishtina – Larne që nis nga ora 20:00, do të transmetohet drejtpërdrejtë në Kohavision.
Rastet më të mira për shënim, Prishtina i pati nga një në të dyja pjesët. Në pjesën e parë, përkatësisht në minutën e 12-të, Blend Baftiu ishte në pozitë të mirë. Nga krahu i majtë, Gjorgje Shaletiq, që luajti si titullar përballë irlandezëve, harkoi bukur nga krahu i majtë nga aksioni i nisur prej Valmir Veliut. Por, gjuajtja e Blend Baftiut ishte qendrore dhe pa telashe e priti portieri Rohan Ferguson.
Në 45 minutat e para, momente të mira pati edhe portieri Ardit Nika i Prishtinës që nuk lejoi të mposhtej.
Prishtina rrezikshëm u shfaq edhe në minutën e 64-t, që ishte momenti më i mirë në ndeshje.
Pas harkimit të Veliut, Leotrim Kryeziu gjuajti me kokë, por portieri kundërshtar e priti gjuajtjen e parë të kapitenit. Kryeziu edhe pas topit të kthyer u ndal nga portieri i Larnes, ndërsa topi mbeti në zonë.
Gjelbrim Taipi tentoi me të djathtën në të njëjtin aksion, por një mbrojtës i Larnes e largoi topin nga vija e portës.
Prishtina në rrethin e dytë kualifikues të Ligës së Konferencës, u bart pasi u eliminua nga Sheriff Tiraspoli i Moldavisë në rrethin e parë kualifikues të Ligës së Evropës.
Humbi në Tiraspol 4:0 në ndeshjen e parë, ndërsa javën e kaluar fitoi 2:1 në “Fadil Vokrri”, por jo mjaftueshëm për të avancuar tutje.
Në rast se Prishtina e eliminon Larnen e Irlandës së Veriut, në rrethin e tretë kualifikues të Ligës së Konferencës do ta ketë fituesin e ndeshjes Varazhdin – Santa Clara.
Përveç Prishtinës, në Ligën e Konferencës luan edhe Ballkani. Ballkani e fitoi ndeshjen e parë në Prishtinë ndaj Florianas së Maltës, 4:2.
Drita ndërkohë është në rrethin e dytë kualifikues të Ligës së Kampionëve. E humbi ndeshjen e parë në Kopenhagë 2:0, nga Copenhageni.