Sigal Prishtina e ka vazhduar serinë pozitive në elitën e basketbollit të Kosovës.
Kryeqytetasit të shtunën në Pallatin e Sporteve në Prishtinë fituan edhe ndaj prizrenasve të Bashkimit me rezultatin 86:68.
Ishte ndeshje që i takoi xhiros së 19-të të Superligës së Kosovës në basketboll.
Për “bardhekaltrit” ishte fitorja e dhjetë rresht.
Bashkimit nga ana tjetër iu ndal seria e katër fitoreve të njëpasnjëshme.
Pas 19 ndeshjeve të luajtura, Prishtina ka 14 fitore e pesë disfata, me 33 pikë gjithsej.
Bashkimi mbetet me 27 pikë, me tetë fitore e 11 humbje.
Periudha e parë e ndeshjes ishte më e barabartë dhe u fitua nga vendësit 16:11, ndërsa dallimin Prishtina e bëri në çerekun e tretë, kur edhe u shkëput në 12 pikë.
Më pas e ruajti epërsinë dhe nuk lejoi befasi për të fituar në fund, 86:68.
Dardan Berisha ishte basketbollisti më në formë në parket.
Ai u dallua te Prishtina me 29 pikë të shënuara, gjashtë kërcime, e shtatë asistime.
Kontribut të madh në fitore dha edhe Dustin Thomas që pati statistika prej 17 pikëve, pesë kërcimeve e dy asistimeve.
Te prizrenasit lojë shumë të mirë pati Curtis Jones që shënoi 24 pikë, gjashtë kërcime e dy asistime, ndërsa Dajuan Graf realizoi 11 pikë. Ai pati edhe gjashtë kërcime e gjashtë asistime.
Për trajnerin e kryeqytetasve, Ahmet Kandemir, ishte fitorja e katërt rresht qëkur u zyrtarizua si trajner i ri i Prishtinës.