Trajneri i Dritës, Zekirija Ramadani, ka thënë se fitorja e ekipit të tij ndaj Ballkanit ka bërë që të rihapet pak gara për titull të kampionit.
Ai ka thënë se lojtarët e tij kanë treguar karakter të fort përballë atyre të Ballkanit.
“Padyshim se jam i lumtur për rezultatin dhe qasjen në lojë. Lojtarët treguan karakter dhe me plot meritë janë pjesë e Dritës. Është punë e madhe të kthesh rezultat ndaj një rivali për titull të kampionit. Ishte një derbi i vërtetë ku në pjesën e dytë ne duhej ta menaxhonim rezultatin, por nuk lejuam të rrezikohemi. E vetmja mundësi e Ballkanit ishte të na rrezikonte nga goditjet standarde. Jam i lumtur për këtë fitore dhe do të bëjmë një pushim më me gëzim. Me këtë fitore skuadrat do të futen në garë për titull. Kjo fitore në një formë bën rihapje të vogël të garës për titull”, ka thënë Ramadani.
Ai ka shtuar se fitorja ndaj Ballkanit ka konfirmuar se humbja nga Malisheva ka qenë aksidentale për ekipin e tij.
“Futbollistët e Dritës kanë qenë edhe para meje. Pra i kam gjetur këtu. Por unë mendoj se kemi gjetur drejtimin e duhur për t’i motivuar dhe nxjerrë maksimumin. Kemi nxjerrë mirë deri tash dhe fitorja ndaj Ballkanit tregoi se humbja nga Malisheva ka qenë aksidentale”, ka thënë trajneri shkupjan.
Drita mposhti 2:1 Ballkanin në ndeshjen e mbetur të xhiros së tretë të Superligës së Kosovës në futboll. Drita tash është pesë pikë larg vendit të parë që mbahet nga Ballkani, që do ta zhvillojë edhe ndeshjen e fundit të mbetur ndaj Gjilanit në fundjavë.