Komiteti Olimpik i Kosovës ka reaguar pas publikimit të rrëfimit të futbollistit Belgin Jashari.
Në një shkrim të publikuar në llogarinë zyrtare në Facebook, KOK deklaron se rrëfimi i tij për dhunën dhe diskriminimin e vazhdueshëm është alarmues dhe i papranueshëm.
“Sporti nuk njeh ngjyrë, prejardhje apo përkatësi etnike. Dhuna dhe urrejtja nuk kanë vend në sport, nuk kanë vend në shoqërinë tonë.
Ne i qëndrojmë pranë Belginit dhe të gjithë të rinjve që guxojnë të ndjekin ëndrrat e tyre në fushat sportive, e sidomos kur ëndërrojnë të veshin fanellën e Kombëtares së Kosovës” – thuhet në reagim.
Tutje, KOK ka pasur edhe një thirrje për institucionet relevante.
“U bëjmë thirrje institucioneve relevante që ta trajtojnë me urgjencë këtë rast dhe të garantojnë një ambient të sigurt dhe të drejtë për çdo sportist, pa dallim”.