Autori i emisionit “Kampionët”, Lorik Gashi që është njëherësh edhe redaktor i sportit në Kanal 10, ka sqaruar situatën e fundit që ka ndodhur në emisionin e fundit sportive për këtë vit dhe pas përfundimit të tij.
Gashit i kishte dalë emisioni nga kontrolli krejtësisht.
Pas emisionit u raportua se pati përleshje fizike ndërmjet kryetarit të Trepçës ‘89, Abedin Zeka dhe opinionistit Faruk Statovci, shkruan Gazeta Sport.
Postimi i plotë i moderatorit Gashi:
Të nderuar miq të emisionit “Kampionët”
Në emisionin e fundit për këtë vit kemi diskutuar për (mos) licencimin e FFK-së, por debati i tensionuar, fatkeqësisht ka vazhduar edhe pas përfundimit të emisionit. Megjithatë, të ftuarit e tjerë dhe stafi kanë ndërhyrë për të evituar atë që s’duhet të ndodhte mes zotërinjëve Zeka dhe Statovci. Më vjen keq për atë që ka ndodhur dhe shpresoj ta vazhdojmë debatin për të gjitha temat e sportit në vitin tjetër.