Kanë përfunduar edhe dy takimet tjera të mbrëmjes në Ligën e Kampionëve.
Real Madridi ka barazuar 1:1 me Shakhtar Donetskun në udhëtim në takimin e luajtur në Varshavë të Polonisë.
Për ukrainasit realizator ishte Zubkov që konkretizoi me gol një rast në minutën e 46-të të ballafaqimit.
Los Blancos shmangu disfatë krejt në fund të takimit, kur Rudiger dërgoi topin në rrjetë në minutën e pestë shtesë të duelit.
Real Madridi përkundër barazimit vazhdon lidershipin në Grupin F me dhjetë pikë, katër më shumë se Leipzigu dhe pesë më shumë se Shakhtari.
Me barazim ka përfunduar sfida e dytë ndërmjet Paris Saint-Germainit dhe Benficas.
Ndeshja në “Parkun e Princave” në Paris u mbyll 1:1.
Mbappe kaloi PSG-në në avantazh në minutën e 40-të nga pika e bardhë e penalltisë.
Nga po e njëjtë pozitë, Joao Mario riktheu baraspeshën në minutën e 62-të.
PSG-ja dhe Benfica kanë nga tetë pikë në Grupin H, me parisienët që kryesojnë për shkak të goldallimit më të mirë.