Real Madridi vazhdon ecurinë pozitive të rezultateve në La Liga dhe të dielën e rreshtoi fitoren e tretë.
Me pikët e fituara ndaj Getafes në kuadër të xhiros së 15-të të La Ligas, madrilenët i janë afruar në një pikë Barcelonës lidere, ndërsa e kanë një ndeshje më pak të luajtur.
Barcelona gaboi të shtunën pasi u mposht në shtëpi 2:1 nga Las Palmasi. Tani Barça ka 34 pikë, një më shumë se Reali.
Real Madridi, që në mesjavë pësoi disfatë 2:0 nga Liverpooli në Ligën e Kampionëve, kaloi në epërsi pas gjysmë ore lojë me golin që e shënoi Jude Bellingham.
Mesfushori anglez, tetë minuta më vonë, asistoi për mrekulli për sulmuesin francez.
Mbappe me gjuajtje të saktë shënoi për 2:0 dhe për golin e tetë të kampionatit spanjoll. Rezultati nuk ndryshoi më.
Reali në dy ndeshjet e kaluara në La Liga fitoi ndaj Leganesit e Osasunas, por në “Champions” i ka dy humbje rresht, nga Milani e Liverpooli.