Një lojtar goxha i dashur në Premier League kishte refuzuar transferimin te Liverpooli pasi i donte shumë shisha baret në Londër, ka shkruar The Sun.
Liverpooli kishte bërë përpjekje të angazhonte Adel Taarabtin gjatë kohës së tij te Queens Park Rangers.
Shpresa e dikurshme e Spurs, Taarabt u bë i preferuari i tifozëve gjatë kohës së tij në Angli, me aftësitë e tij prej futbollisti. Atë e kanë dashur edhe tifozët e ekipeve rivale. Momentet e magjisë së marokenit bënë që ai të vlerësohej lojtari që “rruga nuk do ta harronte asnjëherë”.
Ai kishte refuzuar kalimin te Liverpooli për shkak të dëshirës për të vizituar shisha baret në Londër. Kështu ka thënë Darren Bent, ish-bashkëlojtar i Taarabtit.
“Unë njoh disa lojtarë që luanin në Londër dhe nuk kishin asnjë interesim të largoheshin nga Londra. Do t’ua jap një shembull. Emri i tij ishte i lidhur me klube në veri, klube të mëdha gjithashtu. Mendoj se Liverpooli ishte i lidhur me të për një kohë. Unë e pyeta se çka do të bëjë dhe ai më tha se nuk do të largohet nga Londra, pavarësisht ofertës. Më tha ‘Benty, unë çdo ditë ushtroj, shkoj në King’s Road, shisha. Nuk dua të largohem nga Londra”, ka treguar Bent.
Taarabt 33-vjeçar, aktualisht luan për Al-Nasr në Emiratet Arabe. Ka luajtur te Lensi, Tottenhami, QPR-ja, Fulhami, Milani, Benfica e Genoa.