Aloja e Kombëtares së Kosovës, Fitore Aliu, nga edicioni i ardhshëm garues, 2024/2025, do të luaj në Superligën e Zvicrës.
Aliu tashmë ka nënshkruar me skuadrën Kreuzlingen. Te skuadra elitare e Zvicrës presin shumë nga majtakja 24-vjeçare.
Deri më tani Fitore Aliu ka luajtur për skuadrën Kappelwindeck/Steinbach në Bundesliga 3 të Gjermanisë. Këtë kampionat ka realizuar 68 gola në 14 ndeshje. Fitorja vazhdimisht është shquar për efikasitet dhe tani ka bërë hapin e rëndësishëm në karrierë.
Ajo që prej vitit 2017 është prej lojtareve të rëndësishme të Kombëtares sonë.
Sipas njoftimit të Kreuzlingenit, Fitorja ka pasur oferta edhe nga Bundeslia 1 dhe Bundesliga 2, por ka vendosur për transferim në Zvicër.
“Për mua, Fitorja ishte absolutisht një lojtare e pëlqyer. Me të, ana jonë e djathtë e sulmit do të fitojë edhe më shumë sa i takon depërtimit dhe shënimit të golave”, ka thënë trajnerja e Kreuzlingenit, Kristina Ertl-Hug.
Kreuzlingeni është i treti në Superligën e Zvicrës. Pjesë e kësaj skuadre është edhe Pashke Marku. Në ekipin e hendbollistëve ka shumë lojtarë shqiptarë.
Me kalimin te Kreuzlingeni, Fitore Aliu pritet të bëhet edhe më e rëndësishme në Kombëtaren e Kosovës.