Ish-mesfushori i Borussia Dortmundit, Marco Reus, i është bashkuar skuadrës LA Galaxy në ligën MLS të Shteteve të Bashkuara të Amerikës.
Lajmi për transferimin e tij u bë zyrtar të enjten, ndërsa ai i bashkohet skuadrës amerikane si futbollist i lirë.
35-vjeçari u largua nga Dortmundi në muajin maj pas 12 vjetëve të kaluara te skuadra gjermane.
Mesfushori gjerman ka nënshkruar kontratë për dy vjet e gjysmë me klubin e ligës MLS.
“Marco Reus është futbollist i klasit botëror që ka shkëlqyer në nivelin më të lartë të sportit. Ka luajtur në dy finale të Ligës së Kampionëve për Dortmundin dhe ishte pjesë e Gjermanisë në Kupën e Botës”, ka thënë menaxheri i përgjithshëm i LA Galaxy, Will Kuntz.
Reusi, dy herë futbollisti më i mirë i vitit në Gjermani, e nisi karrierën në Akademinë e Dortmundit, ndërsa iu bashkua në vitin 2006 skuadrës Rot Weiss Ahlen. Nga viti 2009 deri në vitin 2012, karrierë ka bërë edhe te Borussia Moenchengladbach, para se të rikthehej te Dortmundi.
Me “verdhezinjtë”, Reus ka zhvilluar 429 ndeshje, ndërsa ka shënuar 170 gola e ka dhuruar 131 asistime.
Ka 48 paraqitje për Gjermaninë.
Reus ka fituar dy Kupa të Gjermanisë dhe dy Superkupa gjermane.