Cristiano Ronaldo është zyrtarizuar si pjesë e skuadrës së Portugalisë për ndeshjet kualifikuese të Evropianit të vitit të ardhshëm, kundër Lihtenshtajnit dhe Luksemburgut këtë muaj.
Kishte pikëpyetje nëse sulmuesi 38-vjeçar do të vazhdonte me përfaqësuesen portugeze pas Kupës së Botës 2022.
Ai u largua nga fusha shumë i dëshpëruar kur Portugalia u eliminua nga Maroku në çerekfinale të Botërorit.
Roberto Martinezi e ka zëvendësuar Fernando Santosin në postin e përzgjedhësit të Portugalisë dhe e ka ftuar Ronaldon në skuadër.
Martinez ka thënë se Ronaldo është shumë i rëndësishëm për ekipin dhe shtoi se nuk e shikon moshën.
Portugalia e pret Lihtenshtajnin më 23 mars dhe luan në udhëtim te Luksemburgu tri ditë më vonë.
Ronaldo, i cili mban rekordin me më së shumti gola në nivel përfaqësuesesh me 118 gola në 196 paraqitje për Portugalinë, u largua nga Manchester Unitedi në nëntor pas intervistës që bëri bujë.
Ai iu bashkua klubit të Arabisë Saudite, Al Nassr, si futbollist i lirë në muajin janar.
Ronaldo ka shënuar tetë gola në nëntë paraqitje për ekipin arab.