Kampioni i Italisë, Napoli, ka bërë disa transferime në këtë afat kalimtar. Për transferimet dhe në përgjithësi për përgatitjet për edicionin e ri, të dielën ka folur mbrojtësi Amir Rrahmani.
Rrahmani ka thënë se faza përgatitore e edicionit të kaluar ka qenë më e vështira, ndërsa shpreson që këtë vit të kalojnë më lehtë.
“Të gjithë lojtarët që janë afruar janë të talentuar. Nuk kanë ardhur këtu rastësisht. Ata kanë luajtur për ekipe të forta dhe klubi i ka zgjedhur për një arsye. Të gjithë janë vërtetë të mirë”, ka deklaruar Rrahmani për “Sky Sport”. Ai foli në kampin stërvitor Dimaro, ku Napoli është duke u përgatitur.
Në mesin e lojtarëve të transferuar janë edhe mesfushori Kevin De Bruyne që u largua nga Manchester City, si dhe Sam Beukema që së shpejti pritet të nis stërvitjet me Napolin. Ai ishte lojtar i Bolognas.
“De Bruyne dinte shumë për Napolin para se të vinte. Ai i ka pyetur disa bashkëlojtarë te Belgjika. Ka shumë kualitet. Zakonisht kur shkon te ndonjë skuadër e re duhet të mësohesh të bësh atë që kërkon dhe dëshiron trajneri. Por, padyshim se De Bruyne është prej më të mirëve në skuadër. Sa i përket Beukemas, unë gjithmonë mundohem t’u flas mbrojtësve të rinj që transferohen. Ne duhet t’i mësojmë lëvizjet e njëri-tjetrit. Kjo është e rëndësishme, lëvizja në fushë, që do ta bënte punën edhe më të lehtë për mua”, ka deklaruar Rrahmani.
Rrahmani me Napolin i ka dy tituj të fituar në Serie A.