Kapiteni i Kosovës, Amir Rrahmani, ka firmosur kontratën e re me Napolin, e cila do të bëhet zyrtare brenda këtij muaji, ka shkruar të martën Fabrizio Romano. Bëhet e ditur se Rrahmani është pajtuar me kushtet e ofruara nga Napoli dhe do të jetë pjesë e ekipit italian edhe për një periudhë të gjatë.
Me kontratën e re, pasi aktualja i skadon vitin tjetër, Rrahmani do të jetë pjesë e Napolit deri në verën e vitit 2027.
Ai ka edhe opsionin e rinovimit edhe për një vit tjetër, ndërsa do të ketë pagë vjetore prej 2.5 milionë eurosh.
Rrahmani është ndër mbrojtësit më të vlerësuar në Serie A, ndërsa këtë edicion ka fituar titullin e kampionit me Napolin. Në 32 ndeshje të luajtura deri më tani, ai ka kontribuar edhe me 2 gola e 1 asistim. 29-vjeçari është pjesë e Napolit prej vitit 2020, kur iu bashkua nga Verona.