Albion Rrahmani vlerëson se e ka mentalitetin e duhur për të bërë karrierë të suksesshme në futboll. Dhe mentalitetin e konsideron pikën e tij më të fortë.
Ka një muaj që sulmuesi i Kosovës iu bashkua kampiones së Çekisë, Sparta Pragës. Të mërkurën Sparta ka publikuar një intervistë me Rrahmanin që e nisi suksesshëm karrierën në klubin çek.
Sparta po paraqitet edhe në Ligën e Kampionëve, ndërsa ndeshjen e parë e fitoi.
Rrahmani fillimisht është pyetur për jetën në Pragë.
“Është shumë mirë këtu. Jam i lumtur të jem pjesë e ekipit dhe të jem këtu. Po luaj në një qytet të bukur, në garë të nivelit të lartë dhe i rrethuar nga një ekip vërtet i mirë. Nuk shkoj shumë në qytet, por përfundimisht më ka lënë përshtypje të mira deri më tani”, ka thënë Rrahmani.
Ai ka theksuar se qendra stërvitore e Spartës është shumë e mirë e fushat e stërvitjes po ashtu. Rrahmani është përshtatur shpejt, ndërsa thotë se kjo është meritë e bashkëlojtarëve.
Në stërvitje, Rrahmani mundohet të shënojë nga secila pozitë.
“Duhet të keni qasjen e duhur dhe të përfitoni nga secila mundësi që paraqitet, jo vetëm në ndeshje. Një rast i mirë mund të vijë një apo dy herë në ndeshje, kështu që duhet ta bësh më të mirën për të shënuar. Mendoj se mentaliteti është pika ime e fortë. Fakti se provoj të shënoj në secilin shans që fitoj në stërvitje është dëshmi për këtë”, thotë 24-vjeçari nga Podujeva. Ai iu bashkua Spartës nga Rapid Bukureshti ku shkëlqeu përgjatë një viti.
Në elitën çeke, Rrahmani ka një gol e një asistim në dy paraqitje. Tashmë ka debutuar në Champions, ndërsa në kualifikime të Ligës së Kampionëve realizoi gol.
Te Sparta janë edhe Ermal Krasniqi, Qazim Laçi e Indrit Tuci. Ndeshjen e ardhshme në Champions, kampioni çek e ka ndaj Stuttgartit më 1 tetor në Gjermani.