Mesfushori i Kosovës në futboll, Donat Rrudhani dhe sulmuesi, Albion Rrahmani janë shprehur optimist për fitore ndaj Rumanisë.
Përfaqësuesja e Kosovës të martën ka vazhduar stërvitjet para duelit ndaj Rumanisë. Kosova luan të premten në Prishtinë ndaj Rumanisë në ndeshjen që është e vlefshme për Grupin 2 të Ligës C të Ligës së Kombeve
“Atmosfera është shumë e mirë gjithmonë këtu me Kosovën, Është kënaqësi e madhe dhe krenari me qenë pjesë e grupit të Kosovës. Stërvitjet e para kanë shkuar shumë mirë, por unë të hënën nuk isha pjesë e stërvitjes, pasi kam luajtur të dielën me klubin tim. Por sot ka qenë një stërvitje shumë e mirë, intensive, angazhim i madh nga futbollistët, dhe kemi punuar shumë në anën taktike. Besoj që do të presim fitore. Ne jemi të gjithë të bindur që do të fitojmë ndeshjen ndaj Rumanisë. Do të luajmë për t’i fituar tre pikët. Ne e dimë se çfarë ka ndodhur në ndeshjen e kaluar me Rumaninë dhe e kemi një motiv shtesë nga loja e fundit, dhe shpresoj që do të fitojmë. Faleminderit për mbështetjen si gjithmonë si në humbje si në fitore, tifozët gjithmonë janë prezentë. Kjo është një krenari e madhe për ne dhe një mbështetje shumë e rëndësishme nga Dardanët dhe nga të gjithë tifozët e tjerë”, ka thënë futbollisti i Luzernit, Donat Rrudhani.
Rrahmani pret mbështetje shumë të madhe nga tifozët për ndeshjen ndaj Rumanisë.
“Atmosfera është shumë e mirë. Jemi duke punuar shumë mirë dhe jemi të fokusuar të gjithë për ndeshjen hapëse të Ligës së Kombeve. Jemi të gatshëm që t’i ftojmë pikët e para në këtë grup të ri. Po shpresoj që së pari të më jepet mundësia nga selektori dhe pastaj do të bëjë maksimumin që ta tregoj vetën dhe jam në një moment shumë të mirë dhe shpresoj që ta kem atë moment edhe në përfaqësuesen tonë. I presim të gjithë tifozët të vinë dhe të na përkrahin të gjithë së bashku. Së bashku ne mund të arrijmë gjëra shumë të mëdha”, ka thënë sulmuesi më i ri i Spartës së Pragës, Albion Rrahmani.