Ish-mesfushori gjerman Bastian Schweinsteiger, që luajti me skuadrën e Manchester United midis viteve 2015 dhe 2017, foli për aventurën e tij në Angli dhe me “djajtë e kuq”, asokohe të drejtuar nga José Mourinho. Në një intervistë dhënë legjendës së United, Gary Neville, ai zbuloi mjaft sekrete.
“Kur mbërrita te Manchester United, u stërvita me Zlatan Ibrahimovic ditën e parë. Mendova “ai është fantastik, një lojtar i jashtëzakonshëm me të cilin mund të luaj dhe të stërvitem”. Të nesërmen, kur mbërrita në Carrington, menaxheri John Murtough ishte aty dhe më tha “nuk të lejojnë në dhomën e zhveshjes“, shprehet Schweinsteiger.
Duke vijuar bisedën, ish-mesfushori kujton: “E pyeta pse dhe ai më tha se e kishte vendosur trajneri. Padyshim që nuk ishte aq e lehtë edhe për të. Kështu që, shkova në një dhomë tjetër zhveshjeje dhe u zhvesha atje. Gjithashtu, i kërkova të më sillte pajisjet dhe këpucët e mia. E pyeta se me kë do të stërvitesha dhe ai u përgjigj: “Ne i kemi rezervat…”.
“Kështu, unë u stërvita me 16-vjeçarët. I kërkova nëse mund të flisja me Mourinho, pasi stërvitja me të rinjtë shkoi keq dhe mendova se ishte një shaka. Pata një takim me Mourinho pasdite dhe ai më shpjegoi se nuk më pa të lumtur te Manchester United, sepse kur u lëndova, shkova të shërohem me mjekët gjermanë dhe kalova kohë në vendin tim. Unë e bëra atë gjë për të përmirësuar gjendjen time fizike”, tha Schweinsteiger.
“Më pas, nisa të stërvitem më vete për tre muaj. Mourinho nuk më la kurrë të stërvitem me ekipin e parë, as që i pashë ata djem. Më duhej të stërvitesha para ose pas seancës së tyre, isha shumë i trishtuar, dhashë gjithçka për klubin, jo vetëm për Mourinho”, shprehet Schweinsteiger. /Ballkani.info