Radja Nainggolan i dha fund aventurës 17-vjeçare në Itali në gushtin e vitit të kaluar. Mesfushori u rikthye në Belgjikë duke firmosur për dy vite me Antwerp, por aventura me skuadrën belge ka marrë fund.
Drejtuesit e klubit kanë zhvilluar një takim me “ninxhën”, të cilit i kanë komunikuar se nuk do të veshë më fanellën e ekipit të parë. 34-vjeçari duhet të presë merkaton e dimrit për të gjetur një klub të ri në karrierë.
Nainggolan u pezullua nga drejtuesit e Antwerpit më 18 tetor, pasi kamerat e kapën duke pirë cigare elektronike në pankinë përpara nisjes së një ndeshjeje, veprim për të cilin lojtari me origjinë nga Indonezia kërkoi ndjesë.
“Më vjen keq për atë që bëra. E kuptoj që është e gabuar, por në atë moment nuk e mendova aq gjatë”, deklaroi Nainggolan, por tek Antwerpi kanë vendosur të mos e tolerojnë aspak, duke vendosur të ndahen përfundimisht me të.
