Serbia dhe Shqipëria do të organizojnë Kampionatin Evropian për lojtarët nën 21 vjeç, dhe këtë e ka konfirmuar sekretari i përgjithshëm i Federatës së Futbollit të Serbisë, Branko Radujko.
Këto dy vende mbetën kandidatët e vetëm pas tërheqjes së Belgjikës dhe Turqisë.
Prandaj, është e sigurt që UEFA do të miratojë kandidaturën e tyre për turneun kontinental që do të luhet në vitin 2027, gjë të cilën e ka konfirmuar edhe Radujko, transmeton Ballkani.info.
“Me shumë gjasa ndeshjet do të luhen në masën më të madhe në vendin tonë. Vendimi përfundimtar do të dihet në dhjetor. Ne jemi optimistë për këtë”, tha Radujko për mediet serbe.
Bashkëpunimi mes Shqipërisë dhe Serbisë ngjalli reagime të shumta në opinionin kosovar, të cilët mbetën të habitur sesi FSHF pranoi të organizoi një event të tillë me Serbinë, kur dihet për të kaluarën e këtij vendi, derisa tifozët serbë edhe sot vazhdojnë të urrejnë shqiptarët ku në çdo stadium vendosin pankarta skandaloze kundër Kosovës dhe shqiptarëve. /GazetaSport