Është një nga pamjet simbol të fazës përgatitore të Realit të Madridit. Ditën që Pintus bëhet “djalli” vetë, dhe i nënshtron lojtarët në një test të ashpër fizik që bën xhiron e botës, për shkak të maskave spektakolare të mbajtura nga futbollistët e Ançelotit.
“Ajo që bëjnë lojtarët e Madridit është një test stresi me një pajisje portative”, thotë Raul Notario, trajner fizik, drejtor sportiv i universitetit “Alfonso X”. “Lojtarët kryejnë një test tipik stresi, por me një sistem portativ për të matur kapacitetin maksimal të oksigjenit (VO2 max). Maska përdoret për të njohur kapacitetin e frymëmarrjes së futbollistit përmes një elektrokardiograme dhe analizave të gazit, siç është dioksidi i karbonit që lojtarët nxjerrin” ka shpjeguar trajneri për “AS”.
Nuk ka asgjë mrekulli: thjesht teknologji dhe shkencë. Maskat që përdor Madridi janë modeli “Cosmed V5”. Secila prej tyre kushton rreth 30 mijë euro, përfshirë softuerin. Pavarësisht se sa e rëndë është maska, pajisjet janë të thjeshta. Kompleti përfshin maskën, e cila është e lidhur në pjesën e pasme të qafës me disa shirita, dhe një çantë shpine të vogël (ajo ka përmasa rreth 20x20x6 centimetra, një madhësi prej 2,4 litra dhe peshon më pak se gjysmë kilogram) e cila është kutia nga kur merren, përmes një antene e vogël, të dhënat të cilat dërgohen me “Bluetooth” në një kompjuter ose tablet në kohë reale.
Testet i sigurojnë Pintusit të dhëna shumë të vlefshme që e lejojnë atë të programojë dhe të mbajë nën kontroll punën fizike të lojtarëve gjatë sezonit. Çdo stres test nuk zgjat më shumë se 15-20 minuta, sepse duhet bërë në nivelin më të lartë. Objektivi është të shtyjë trupin në maksimum. Sipas testit duhet të shkosh nga njëra anë e fushës në tjetrën. Gjithçka nis me 8 km/h dhe çdo bip rritet me 0,5 km/h. Pas 20 minutash arrihet deri në 18-20 km/h, por askush nuk e bën dot këtë!