Senad Jaroviq është zgjedhur futbollisti më i mirë i xhiros së 36-të dhe të fundit për këtë edicion në Superligën e futbollit.
Futbollisti i Gjilanit i realizoi dy gola dhe e dhuroi një asistim në fitoren vendimtare të skuadrës së tij ndaj Dukagjinit me rezultat 4:2, e cila ua mundësoi “Skifterave” që ta shmangin barazhin.
Pasi mori këtë çmim, Jaroviq u shpreh i lumtur që u vlerësua sërish si më i miri i javës dhe që skuadra e tij e arriti objektivin e këtij edicioni.
“Jam i lumtur që ia arritëm objektivit për t’i ikur barazhit. Falënderoj tërë ekipin, kryesinë dhe shtabin teknik në krye me Gentijan Mezanin. Kam kaluar një kohë fenomenale në Gjilan dhe dua t’i falënderoj tifozët të cilët më kanë pranuar me ngrohtësi. Për mua ishte nder të isha pjesë e Gjilanit”, deklaroi Jaroviq për faqen zyrtare të Federatës së Futbollit të Kosovës.