Trajneri i mirënjohur kosovar, Sami Sermaxhaj ka konfirmuar largimin e tij nga Malisheva.
Sermaxhaj nëpërmjet llogarisë së tij në Facebook ka bërë të ditur se është larguar nga klubi i Superligës, ndër tjerash duke e akuzuar edhe drejtorin sportiv të klubit, Kastriot Kafegjollin, shkruan Demokracia.com.
“Të dashur futbollist të FC Malisheva, nga zemra ju uroj gjitha të mirat e kësaj bote, ishte knaqësia ime dhe bashkëpunëtorëve të mi Petrit Rushiti dhe Qëndrim Kida të punonin me ju. Vlerësojeni vet nëse ne ishim fajtor që nuk ju stërvitum dhe udhëheqëm profesionalisht apo ishte Kafegjolli që qëllimisht na mbante peng me kontrata të pa vërtetuara në klub dhe federatë për të realizuar qëllimin e tij që veq u bë publik. Mirëupafshim”, ka shkruar Sermaxhaj në Facebook.
Ditë më parë në media u raportua për pezullim të punës së Sermaxhajt te Malisheva, për shkak i mosdeponimit të kontratës së tij në Federatën e Futbollit të Kosovës.