Magjia e Edon Zhegrovës”. Kështu ka shkruar sajti zyrtar i Lillet për paraqitjen e reprezentuesit të Kosovës në ndeshjen e Lillet ndaj Lorientit.
Zhegrova hyri në lojë vetëm në minutën e 82-të, kur rezultati ishte 1:1. Në minutën e 89-të goditi mjeshtërisht nga një pozitë e vështirë për 2:1. Menjëherë në minutën e 91-të shpërtheu në gjysmën e fushës së kundërshtarit dhe shënoi gol edhe më të bukur për 3:1.
Ndonëse në fushë i kaloi pak më shumë se dhjetë minuta, kjo ishte paraqitja më e mirë e reprezentuesit të Kosovës te Lille. Ndeshja i ka takuar xhiros së 29-të të kampionatit francez, ndërsa për Lillen fitorja ishte shumë e rëndësishme. Skuadra e Zhegrovës është e pesta në Ligue 1 me 42 pikë. Është në zonën që dërgon në kupa evropiane dhe në garë për pozitë edhe më të mirë.
“Dhe magjia e Edon Zhegrovës u shfaq. Pas aktivizimit në fund të ndeshjes, kosovari kishte paraqitje për të mbajtur në mend duke shënuar dy herë për tre minuta, me dy goditje të pandalshme me këmbën e majtë. Ai ndryshoi lojën që Lille e meritoi ta fitonte”, ka shkruar sajti zyrtar i Lillet.
Zhegrova po i ndan minutat me dy lojtarë të tjerë të Lille. Por pas paraqitjes së madhe të dielën, ai pritet të ketë më shumë hapësirë në ndeshjet e ardhshme. Për këtë ka shkruar edhe sajti zyrtar i Ligue 1.
Në këtë edicion, 24-vjeçari ka tri gola e katër asistime në elitën franceze.
Ai natyrisht ishte lojtari i ndeshjes. Zhegrova shkëlqeu pas kthimit te Lille nga Përfaqësuesja e Kosovës. Ai shënoi golin e vetëm në barazimin 1:1 me Andorrën, rezultat që u vlerësua i papranueshëm.
“Sapo jam kthyer nga obligimi ndërkombëtar. Isha shumë i motivuar për të ndihmuar ekipin dhe këtë e bëra. Unë ende jam lojtar i tillë. Më pëlqen të dal në fushë dhe të ndryshoj drejtimin e lojës. Jam i lumtur që sot e kam bërë këtë”, ka thënë Zhegrova pas ndeshjes.
Shfaqja e tij, megjithatë, nuk ka përfunduar në fushë.
Pas ndeshjes ai doli në tribunë ku ishin tifozët ultras të Lillet. Tifozët nisën ta thërrasin emrin e tij, ndërsa kosovari kishte vendosur shallin e tifozëve përreth kokës. Në fund ia dha fanellën njërit prej tifozëve.
“Edoni u kthye shumë mirë. Ai ishte vendimtar. Është shumë e rëndësishme që të gjithë lojtarët të jenë vendimtarë, edhe duke luajtur për dhjetë minuta. Startuesit kanë ndihmuar po ashtu ekipin. Më pëlqeu ajo që bëri Edoni. Ekipi ka besuar në fitore deri në fund”, ka thënë trajneri i Lillet, Paulo Fonseca.
Paraqitja me Kosovën duket që e ka motivuar Zhegrovën. Ndërkohë dygolëshi vendimtar i së dielës do ta ndihmojë atë që të luajë më shumë në fazën vendimtare të kampionatit.