Përfaqësuesja U21 e Kosovës në futboll ka kryer edhe stërvitjen e fundit për duelin kundër Polonisë në kuadër të Grupit D.
Ballafaqimi mes Polonisë U21 dhe Kosovës U21, i rëndësishëm për kualifikim në Evropianin 2025, do të zhvillohet të premten dhe nis në orën 20:00 në stadiumin “Orlen Arena” në Plock.
“Atmosfera në radhët e Dardanëve U21 është shumë e mirë dhe të gjithë janë të gatshëm për të dhënë maksimumin në këtë sfidë të vështirë”, ka shkruar FFK-ja të enjten mbrëma në faqen zyrtare.
Shpresat e Kosovës me selektor Afrim Tovërlanin, e nisën mbarë ciklin kualifikues të Evropianit, pas fitores 2:0 ndaj Estonisë më 20 qershor, në stadiumin “Fadil Vokrri” në Prishtinë.
Sulmuesi Arian Llugiqi dhe qendërmbrojtësi Andi Hoti shënuan golat e fitores.
Pas ndeshjes me polakët, Kosova U21 në stadiumin “Fadil Vokrri” në Prishtinë do të jetë nikoqire e Gjermanisë së kësaj grupmoshe.