Xavi Simons është lojtari më i ri i Tottenham Hotspurit. Tottenhami të premten e ka zyrtarizuar transferimin e Simonsit nga RB Leipzigu.
Simons me Tottenhamin ka nënshkruar kontratë pesëvjeçare.
Mësohet se Leipzigu nga shitja e Simonsit ka përfituar 65 milionë euro.
Reprezentuesi i Holandës, Simons, te Tottenhami do ta veshë fanellën me numrin shtatë.
“Jam shumë i lumtur dhe mezi pres të nis. E kam ëndërruar këtë për një kohë të gjatë. Është një klub i shkëlqyer dhe kur takova trajnerin kryesor e dija menjëherë se ky ishte vendi i duhur për mua. Do t’i sjell ekipit punë të palodhur dhe disiplinë. Dua të bëj gjithçka që mundem për të fituar, për ekipin dhe gjithashtu për tifozët”, ka thënë Simons për faqen zyrtare të Tottenhamit.
Trajneri i Tottenhamit, Thomas Frank, deklaroi se Simons do të jetë forcë shtesë për skuadrën.
“Jam shumë i kënaqur që e kemi sjellë Xavin. Ai është një shtesë e shkëlqyer për skuadrën. Ai është ende i ri, megjithatë ai tashmë ka përvojë të mirë dhe, gjatë viteve të fundit, ka luajtur shumë ndeshje në nivelin më të lartë. Xavi ka dëshmuar aftësinë e tij për të shënuar gola dhe për të dhënë asistime, si nga pozicioni i numrit dhjetë ashtu edhe nga krahu i majtë”, tha Frank.
22-vjeçari Simons me Leipzigun zhvilloi 78 ndeshje duke kontribuar me 22 gola dhe 24 asistime.