Situata e Drilon Islamit te CFR Cluj po bëhet gjithnjë e më shqetësuese, pasi mesfushori nga Kosova është lënë jashtë listës së skuadrës edhe në dy ndeshjet e para zyrtare të sezonit.
Fillimisht, 24-vjeçari mungoi në finalen e Superkupës së Rumanisë kundër FCSB, ku Cluj u mposht 2-1.
Mungesa e tij u komentua si një vendim taktik nga trajneri Dan Petrescu, por edhe në ndeshjen e djeshme (e enjte) ndaj Paks në raundin e parë të Ligës së Konferencës, e cila përfundoi 0-0 në Hungari), Islami nuk u përfshi as në listën prej 24 lojtarësh.
Ndërkohë, mesfushorët tjerë nga Kosova, Meriton Korenica dhe Lindon Emerllahu u aktivizuan si titullarë në të dyja sfidat, duke treguar se Petrescu aktualisht u beson më shumë atyre.
Sipas burimeve të Telegrafit, Islami ende nuk ka arritur të bindë stafin teknik, dhe nuk përjashtohet një largim i mundshëm gjatë këtij afati kalimtar veror.
Konkurrenca në mesfushë është e madhe, dhe pavarësisht pritshmërive të larta nga transferimi i tij nga Prishtina, lojtari për momentin mbetet jashtë planeve.
Në javët në vijim pritet të sqarohet më qartë e ardhmja e tij në Cluj – me opsionin e një huazimi apo transferimi të përhershëm që gjithnjë e më shumë po përmendet në prapaskenë.