Sot (e diel) do të zhvillohen edhe dy ndeshje të tjera në kuadër të javës së katërt në elitën e futbollit kosovar.
Takimi më interesant i ditës së sotme do të luhet në Malishevë, atje ku Malisheva do të jetë nikoqir i kampionit aktual Ballkanit.
Momentalisht Malisheva gjendet në pozitën e katërt me katër pikë të grumbulluara, por me dy ndeshje më pak të luajtura, njëra ndër to ndaj Dritës e cila është shtyrë për shkak të angazhimeve në Evropë të këtyre të fundit.
Ballkani në anën tjetër me një fitore eventuale do të konfirmohej si lider i tabelës së klasifikimit.
Duel që nuk duhet humbur është edhe ai mes Suharekës dhe Gjilanit me këta të fundit që do të synojnë fitoren e parë në këtë edicion të ri të garave.
Suharekasit mbajnë pozitën e gjashtë me katër pikë të grumbulluara ndërsa edhe këta kanë një ndeshje më pak të luajtur me Dritën pikërisht për shkak të arsyes së lartcekur.
Gjilani në anën tjetër renditet në pozitën e tetë dhe ka vetëm dy pikë të tubuara, andaj do të synojë tri pikët për t’u ngjitur lartë në tabelë.
Të dyja këto takime do të luhen me fillim nga ora 16:00.