Një mesfushor nga Brazili, Chelsea firmos me lojtarin që karrierën e nisi në parket!

Pas mbrojtësit Benoit Badiashile, klubi i Chelsea-t shton radhët me një mesfushor brazilian. Fjala është për Andrey Santos i cili është vetëm 18-vjeç dhe ishte pjesë e Vasco De Gama. Nga kjo marrëveshje klubi brazilian përfitoi 13 milionë paund ndërsa në vendlindje, Santos cilësohet si një talent me një të ardhme të ndritur.

Anglezët vijojnë me projektin e tyre për t’i besuar gjithnjë e më shumë të rinjve teksa në skuadrën e drejtuar nga trajneri Graham Potter pikasin emra si Havertz, Gallagher, Mount apo edhe Armando Broja.

Një fakt interesant rreth Santos është se në fillimet e tij, 18-vjeçari ishte projektuar si një lojtar i futsallës, megjithatë me kalimin e kohës, talenti i tij nisi të bëhej edhe më evident duke tërhequr një klub me emër si Vasco De Gama. Santos është lojtari më i ri që ka debutuar për Vasco De Gama në shekullin e 21-të, duke lënë pas edhe emra si Paulinho apo Coutinho.

Tashmë, mesfushori përgatitet të nisë padyshim aventurën më të rëndësishme në karrierë dhe të ndjekë gjurmët e patriotëve të tij që në Europë ia kanë dalë të krijojnë histori.