E ardhmja e Armando Brojës është një nga temat më të nxehta. Sulmuesit kuqezi duhet që sa më parë të gjejë një skuadër të re, teksa Chelsea nuk e ka më në planet e tij. Blutë e Londrës e kanë kaluar shtatlartin nga Malësia e Madhe tek skuadra U21 dhe tashmë presin që sa më parë të marrin një ofertë të kënaqshme për ta larguar nga Stamford Bridge.
Mediat gjermane raportojnë se Stuttgart është skuadra e radhës që ka nisur të interesohet për Brojën. Skuadra e cila befasoi edicionin e shkuar, duke u shpallur nënkampione në Bundesliga kërkon që të afrojë shtatlartin kuqezi. Por, qëllimi kryesor i klubit gjerman është që të huazojë një sulmues, dhe jo të arrijë marrëveshjen për blerjen e kartonit që në këtë merkato. Chelsea në krahun tjetër e ka bërë të qartë se kërkon ta shesë lojtarin, por mund të arrihet një marrëveshje për huazimin me detyrim blerje në fundin e sezonit.
Për Brojën interesim konkret ka patur dhe Milani, që është gati të bëjë një ofertë, ndërkohë që Everton e ka paraqitur ofertën e tij dhe është vetëm në pritje të përgjigjes. Kjo javë pritet që të jetë vendimtare për të ardhmen e Brojës, i cili gjithashtu pret me shumë interes të akomodohet në një tjetër skuadër e të nisë të luajë rregullisht.