FC Prishtina ka shënuar fitore në derbin e xhiros së katërt në Superligë ndaj Llapit.
Kryeqytetasit në stadiumin “Fadil Vokrri” mposhtën ekipin e drejtuar nga Tahir Batatina me rezultat 3:2.
Ishte një ndeshje fantastike me shumë gola, me Llapin që e pati dy herë epërsinë.
Mirëpo, me këtë rezultat ka qenë i pakënaqur fort trajneri i Llapit, Tahir Batatina. Ai pas ndeshjes i ka fyer tifozët e Prishtinës derisa ka dashur ta sulmojë fizikisht gjyqtarin kryesor, Genc Nuza, shkruan Ballkani.info.
Ahmed Januzi kaloi mysafirët në epërsi në minutën e 33-të të ndeshjes, para se Vitija të barazonte rezultatin në sekondat e fundit të pjesës së parë.
Ilir Blakqori e riktheu epërsinë e llapjanëve në minutën e 55-të të ndeshjes.
Në të 69-tën Albin Krasniqi arriti të barazonte shifrat, kurse tetë minuta më vonë Yoan Marc-Olivier shënoi për 3:2 dhe fitoren e madhe të prishtinasve.
Me këtë fitore, Prishtina tani shkon në kuotën e shtatë pikëve në vendin e dytë, aq sa ka edhe Ballkani që prin.
Në anën tjetër, Llapi mbetet në vendin e pestë me katër pikë nga po aq ndeshje.