Skuadra e Lillet u eliminua nga Kupa e Francës, por paraqitja e mirë e Edon Zhegrovës ndaj Lyonit, e ka gëzuar trajnerin Paulo Fonseca. Lille u eliminua në 1/8 e finales nga Lyoni të mërkurën mbrëma, ndërsa Zhegrova ishte ndër më të dalluarit në fushë.
Ai ishte titullar dhe shënoi golin e barazimit për Lillen (2:2), që u eliminua me penallti. Zhegrova luajti deri në minutën e 76-të, ndërsa kjo ishte ndeshja e tij e dytë rresht si startues te Lille dhe që shënon gola. Sulmuesi i krahut edhe vikendin e shkuar shkëlqeu në fitoren e Lillet 3:1 në udhëtim te Rennesi në kuadër të kampionatit francez. Ai kontribuoi me një gol e dy asistime dhe ishte i pazëvendësueshëm te Lille. Dy golat e shënuar ndaj Rennesit dhe Lyonit janë të parët për Zhegrovën në të dy garat e futbollit francez, ndërsa në kampionat i ka edhe dy asistime.
Në total ai ka 15 paraqitje për Lillen deri më tani, ku në Ligue 1 ka regjistruar 12 ndeshje. Zhegrova së fundmi ka treguar formë të mirë tek ekipi francez dhe për këtë është përgëzuar nga trajneri Fonseca. Ky i fundit, po shpreson që Zhegrova të vazhdojë me këtë ritëm deri në fund të sezonit dhe ta ndihmoj ekipin në arritjen e synimeve. Sipas tij, Zhegrova është shndërruar në një lojtar krejtësisht tjetër dhe po luan për ekipin, gjë që është shumë e rëndësishme.
“Edoni ka qenë i sëmurë gjatë ditëve të fundit. Por unë jam i lumtur me paraqitjet e tij që i ka treguar. Mund të them se është bërë lojtar tjetër sa u përket vendimeve që i merr në fushë dhe mënyrën se si luan për ekipin”, ka pranuar Fonseca. “Ai është shndërruar në një lojtar tjetër në aspektin pozitiv. E ka kuptuar se është shumë e rëndësishme që duhet të luajë për ekipin dhe shpresoj të vazhdojë kështu”.
Ndeshjen e radhës Lille e luan kundër Stasbourgut të dielën në kampionat, ndërsa Zhegrova pritet të jetë titullar. Forma e mirë e Zhegrovës do të jetë e rëndësishme edhe për selektorin e Kosovës, Alain Giresse, duke pasur parasysh se në fund të muajit të ardhshëm nisin kualifikimet për “Euro 2024”. “Dardanët” bëjnë pjesë në Grupin I kualifikues, pjesë e të cilit janë edhe Zvicra, Izraeli, Bjellorusia, Rumania dhe Andorra. Ndeshjen e parë në kuadër të këtyre kualifikimeve, Kosova e luan më 25 mars në udhëtim ndaj Izraelit, ndërsa tri ditë më vonë e presin Andorrën në Prishtinë. Aktualisht Lille është në pozitën e gjashtë në tabelë dhe po lufton për një vend që sezonin tjetër dërgon në garat evropiane. Pas 22 ndeshjeve të luajtura, Lille ka tubuar 38 pikë kurse tabelës i prin Paris Saint-Germaini me 54 pikë të mbledhura. 23-vjeçari iu bashkua ekipit francez në janar të vitit të shkuar nga Baseli dhe firmosi kontratë deri në verën e vitit 2026. Ai ka edhe 28 paraqitje për Kosovën dhe tre gola të shënuar.