Drejtori ekzekutiv i Mallorcas, Alfonso Diaz, ka folur për të ardhmen e sulmuesit Vedat Muriqi. Ai ka thënë se askush në klub nuk e ka marrë në konsideratë largimin e sulmuesit të Kosovës.
Të mërkurën ka pasur shkrime në mediat turke se Muriqi pritet t’i bashkohet Fenebahçes.
Por Diaz insiston se Muriqi është i rëndësishëm për ekipin spanjoll.
“Deri më sot nuk ka absolutisht asgjë në lidhje me këtë. Muriqi tashmë e di se çfarë do të thotë për këtë klub. Ai është lider në fushë dhe jashtë saj, është golashënuesi më i mirë, na jep shumë dhe duhet të qëndrojë me ekipin”, ka thënë Diaz, shkruan “Ultima Hora”.
Muriqi me Mallorcan ka kontratë deri në qershor të vitit 2029.
31-vjeçari këtë edicion në La Liga ka shënuar 14 gola.