Trajneri i Manchester Unitedit, Erik ten Hag, është i bindur se Cristiano Ronaldo është ende në gjendje t’i shënojë mbi 20 gola këtë edicion, me gjithë minutazhën e limituar që e ka. Ronaldo u la jashtë ekipit për barazimin e javës së shkuar, 1:1, ndaj Chelseat, pasi kishte refuzuar të futej në lojë në fund të fitores 2:0 kundër Tottenhamit. Paraqitja e Unitedit ndaj Tottenhamit ishte vlerësuar si më e mira nën urdhrat e Ten Hagut dhe ishte një shembull se ekipi po luan më mirë pa portugezin Ronaldo.
Megjithatë, Ronaldo u kthye me gol si titullar tek Unitedi, që të enjten mbrëma triumfoi 3:0 ndaj Sheriff Tiraspolit në Ligën e Evropës. Ronaldo, 37-vjeçar, ka tri gola të shënuar në 13 paraqitje në të gjitha garat këtë edicion.
Por, Ten Hag të premten nuk përjashtoi mundësinë që Ronaldo të arrijë kuotën e 24 golave këtë edicion, aq sa i realizoi sezonin e shkuar për Unitedin.
“Varet nga ai. Unë mendoj se nëse ai shfrytëzon të gjitha rastet që i krijon vetë dhe ato që ia krijon ekipi, atëherë është në gjendje të shënojë gola. Kështu që është e mundur të shënojë mbi 20 gola edhe këtë edicion, por varet nga ai”, është shprehur Ten Hag.
Ronaldo këtë edicion ka qenë titullar në vetëm dy ndeshje në Premier League, ndërsa minutazhën më të madhe Ten Hag po ia jep në Ligën e Evropës. Trajneri holandez ka refuzuar kategorikisht se po e shfrytëzon Ligën e Evropës si mënyrë për t’ia dhënë Ronaldos minutat që po i mungojnë dhe po i kërkon deri më tani.
“Unë nuk kam ekip për Evropë e as ekip për Premier League. Pra, nuk i kam dy skuadra. E shikoj kundërshtarin që e kemi përballë dhe vendos se çka na duhet kundër tij. Tani fokusi im është te ndeshje kundër West Hamit që e luajmë të dielën”, insistoi Ten Hag. “Pastaj e zgjedh formacionin e parë, por gjithashtu kam edhe një plan B dhe C për ta fituar ndeshjen. Pra, mua më duhen këto gjëra për të fituar ndeshjet. Nuk kam nevojë për 11 lojtarë, por për gjithë ekipin”.
Pas startit të dobët, kohët e fundit Manchester Unitedi ka treguar shenja të mëdha përmirësimi nën Ten Hagun, trajner që u emërua në krye të ekipit para fillimit të edicionit. Unitedi ka dështuar që dominimin që e ka në fushë ta konkretizojë me gola. Në pesë ndeshjet e fundit kampionale ka dy fitore.
“Për ta zhvilluar ekipin duhet kohë. Duhet të shkosh gradualisht dhe kjo të merr kohë shumë, të cilën nuk e kam në dispozicion. Jam zakonisht i padurueshëm, por këtë herë më duhet të jem i durueshëm”, tha Ten Hag. “Tash na duhet të përmirësohemi në lojën sulmuese, por kjo është pjesa më e rëndësishme dhe merr shumë kohë. Do të presim dhe besoj se jemi në rrugën e duhur pasi po shkojmë hap pas hapi”.
Pas 11 ndeshjeve të luajtura në Premier League, Unitedi zë vendin e gjashtë në tabelë me 20 pikë të grumbulluara. Tabelës i prin skuadra e Arsenalit me tetë pikë më shumë.