Tenistet e Kosovës e kanë shënuar edhe fitoren e dytë në kuadër të “Billie Jean King Cup”, Kampionatin Botërorin në nivel përfaqësuesesh.
Të premten në Portugali, Kosova fitoi me rezultatin 2:1 ndaj përfaqësueses së Irlandës.
Adrijana Lekaj ia dha të mbarën Kosovës, duke fituar duelin e parë. Ajo fitoi 2:1 në sete ndaj Sinead Loan. Lohan e fitoi setin e parë 6:1, por Lekaj u kthye me fitore 7:5 e 6:3.
Në duelin e dytë, Arlinda Rushiti pësoi humbje të thellë nga Celine Simunyu. Rushiti humbi dy sete me rezultatin 6:1.
Kështu rezultati i përgjithshëm u barazua 1:1 dhe fituesi shpallej në duelin e çifteve.
Adriana Lekaj e Arlinda Rushiti fituan bindshëm ndaj Carragh Courtney e Celine Simunyu. Të dy setet Lekaj e Rushiti i fituan me rezultatin 6:2.
Kosova për herë të parë ka garuar në Grupin II të Botërorit të tenisteve. Në këtë nivel është promovuar vitin e kaluar. Gjatë ngjarjes në Portugali, Kosova fitoi 3:0 ndaj Afrikës së Jugut, ndërsa u mposht me rezultat maksimal nga Lituania, Estonia dhe Gjeorgjia. Kosova më nuk ka ndeshje në fazën grupore, por ka siguruar mbetjen në Grupin II.
“Me këtë fitore, duke u renditur në pozitën e katërt në grup, ekipi ynë siguroi qëndrimin në Grupn II në Kampionatin Botëror ‘Billie Jean King Cup’, një grup mjaft i fortë, në të cilin do të garojë edhe vitin e ardhshëm”, ka njoftuar Federata e Tenisit e Kosovës.