Klubi boshnjak, Borac është gjobitur me afro 4 mijë euro për thirrjet dhe banerët e shfaqur nga tifozët e këtij klubi.
Në ndeshjen e së tetës së finales së Kupës së Bosnjës, të zhvilluar më 18 shkurt kundër Rudarit, tifozët e Borac, me bazë në qytetin e Banjallukës (Republika Srbska), ata kënduan njëherësh edhe për Ratko Mladicin, njëri prej liderëve të luftës dhe kriminelëve serbë në kolapsin e Jugosllavisë.
Ndërkohë, tifozët kënduan edhe “Kosova-Serbi” dhe e shfaqën një flamur rus me sloganin “Slava Russia” (Lavdi Rusisë), njofton mediumi boshnjak “Klix”.
Ndër të tjera, ata e shfaqën edhe një hartë të Kosovës me ngjyrat e flamurit serb.
Tifozët e shfaqën edhe një pankartë me shkrimin: “Kosova është fara nga e cila u rrita, burimi dhe djepi i njerëzve tanë”.
Në rast se përsëriten veprime të tilla të tifozëve, Borac është kërcënuar se do të duhet t’i zhvillojë ndeshjet në stadium të zbrazët.
Në këtë ndeshje me Rudarin, Borac humbi me penallti dhe eksperienca e tij në Kupën e Bosnjë-Hercegovinës për këtë sezon mori fund.