Programi sportiv ‘Libre y Directo’ ka zbuluar pagën që Adnan Januzaj merr në Sevilla.
Shifrat kanë ngjallur revoltë te tifozët e Sevillas, shkruan të mërkurën “elmira.es”. Januzaj paguhet nga Sevilla 2.7 milionë euro neto në vit.
“Kjo do të thotë se Sevillas i kushton 5.4 milionë euro bruto në edicion”.
Edhe pse Adnan Januzaj iu bashkua Sevillas si lojtar i lirë, vlerësohet se është lojtari më i dështuar i afruar në klubin spanjoll. Ai me Sevillan ka kontratë deri në qershor të vitit 2026.
“Adnan Januzaj është një lojtar me cilësi të shkëlqyera. Ose, të paktën, një futbollist që kishte cilësi të mëdha, pasi nuk i ka treguar prej kohësh. Qoftë për shkak të mungesës së angazhimit apo dëmtimeve të shumta që ka pasur vitet e fundit, sulmuesi është një hije e atij që vlerësohej nga Manchester United”, shkruan tutje sajti spanjoll.
Zbulimi i pagës së tij ka ngjallur pakënaqësi te tifozët e Sevillas, të cilët kanë kërkuar largimin e Januzajt. Edhe klubi, sipas sajtit spanjoll, dëshiron që ta lirojë sa më parë lojtarin e kohëpaskohshëm të Belgjikës.
“Në Sevilla mezi presin ta lirojnë atë. Por është Januzaj që nuk dëshiron të lëviz për shkak të pagës së lartë që merr e që kontrata vlen deri në vitin 2026. Januzaj e ka shumë të vështirë të largohet nga klubi. Paratë që merr belgu kanë ngjallur shqetësim te tifozët e Sevillas, të cilët duan largimin e tij nga skuadra. Edhe Sevilla po shikon të gjejë një rrugëdalje për Adnan Januzajn. Në klub janë duke parë mundësitë për ta larguar mesfushorin belg, i cili nuk ka dhënë asgjë për klubin”.
Januzaj në dy edicione me fanellën e Sevillas ka luajtur në 16 ndeshje. Ai nuk ka shënuar asnjë gol, ndërsa ka vetëm një asistim.
28-vjeçari ka luajtur më herët edhe për Bashakshehirin, Real Sociedadin, Manchester Unitedin, Sunderlandin, Borussia Dortmundin. Si i ri ka qenë edhe pjesë e Anderlechtit. Për Belgjikën në 15 ndeshje ka shënuar një gol. Januzaj dikur shihej prej talenteve më të mëdha në futboll. Por karriera e tij ka pasur rënie të madhe.