Fun

    Tifozi i Francës reagon pas goditjes që mori nga ‘raketa’ e Mbappes përpara gjysmëfinales

    Tifozi francez i goditur nga një gjuajtje e fortë e sulmuesit Kylian Mbappe, ka reaguar ndaj rrëzimit që e la pavetëdije nga një “predhë” e francezit.

    Les Bleus po përgatiteshin për një ndeshje gjysmëfinale të Kupës së Botës “Katar 2022” me Marokun, kur superylli i Paris Saint-Germain goditi me top një tifoz në tribunë.

    Megjithatë, goditja e tij ishte e fortë saqë rrëzoi tifozin dhe e la pa vetëdije atë për disa sekonda, ndërsa nuk arriti të përmendej për disa minuta.

    Guillaume, tifozi në fjalë, ka folur tashme për mediat për përvojën e tij mjaft unike në Katar pasi iu dhurua topi që e goditi atë.

    “Unë kam në duar raketën që më goditi në kokë. Unë jam këtu që nga fillimi i Kupës së Botës, i jam bashkuar grupit francez dhe i jam përkushtuar të jem bateristi i grupit të brohoritjes. Po i bija daulles kur ky objekt i bukur [i referohet topit] erdhi për të më goditur dhe më rrëzoi pa ndjenja”, ka thënë fillimisht Guillaume për RMC Sport.

    “I rashë tifozëve përballë meje, u shtangova plotësisht. Dëgjova zhurmë dhe njerëz që bërtisnin për Kylian. Unë pothuajse nuk mbaj mend se çfarë po ndodhte”.

    “Më pas pashë vetëm imazhet që tregonin Kylian duke ardhur drejt meje. Isha i shtangur. Me sa duket ai ka qëlluar nga jashtë zonës. Ishte Olivier Giroud ai që e informoi se diçka kishte ndodhur në tribuna”, përfundoi tifozi.

    Mbappe e gjeti veten jashtë listës së shënuesve një përballjen e fundit me Marokun, por golat e Theo Hernandez dhe Randal Kolo Muani ishin të mjaftueshme për ta parë Francën në finalen e Kupës së Botës “Katar 2022”, ku do të takohen me Argjentinën.