Pasi Rilindja 1974 të hënën akuzoi portierin e saj se i ka lëshuar dy gola në ndeshje me Drenicën, të martën klubi Mitrovica akuzoi arbitrin për dëmtim të rëndë në ndeshje me Lirinë në Prizren.
Edhe ndeshja Liria – Mitrovica i takoi xhiros së katërt të Ligës së Parë, Grupi A. Liria e fitoi 2:1 ndeshjen e së dielës.
Por sipas Mitrovicës, me ndihmë të madhe të arbitrit.
Klubi mitrovicas, që për herë të parë luan në Ligën e Parë, ka shkruar se ajo që ndodhi në Prizren është e paprecedentë dhe e patolerueshme.
Mitrovica ka publikuar edhe videot e situatave në të cilat pretendon se është dëmtuar rëndë.
“Ne kemi besim të madh në organet e Federatës së Futbollit të Kosovës të cilat i ftojmë të merren me rastin. Besojmë fuqishëm që pas këtyre pamjeve dhe shumë rasteve të tjera, do të merren masa për gjyqtatin kryesor, Dreni Skeraj, me prejardhje nga Prizreni. Tri raste të penalltive të paakorduara ku rezultati në tri rastet ka qenë baras, 1:1”, ka shkruar Mitrovica.