Valon Berisha ka vazhduar me asistime në elitën e futbollit të Australisë.
Në A-Leaguen australiane, Berisha me Melbourne Cityn fitoi thellë 4:0 në gjysmëfinalen e plejofit përballë skuadrës Sydney.
Dhe me rezultatin e përgjithshëm 5:1 nga të dyja ndeshjet, Melbourne City ka siguruar finalen në elitën australiane të futbollit.
Mysafirët nga minuta e 20-të luajtën me një lojtar më pak, pasi me të kuq u ndëshkua Max Burgess.
Berisha në minutën e 28-të për pak sa nuk u kthye në asistues, kur pas harkimit të tij u qëllua shtylla pingule.
Me pasim të tij në minutën e 34-t, për pak sa nuk u shënua goli i parë në ndeshje.
Dhe në tentimin e tretë, pas harkimit nga këndi të Berishës në minutën e 37-të, u shënua goli për 1:0 nga Curtis Good.
Tri golat tjerë u shënuan në pjesën e dytë.
Futbollisti i Kosovës, Berisha, luajti deri në minutën e 74-t. 30-vjeçari në 26 paraqitje ka një gol të shënuar e shtatë asistime.
City në finale do të luajë kundër fituesit të ndeshjes Central Coast Mariners – Adelaide United. Mariners ka fituar ndeshjen e parë 2:1.
Finalja është caktuar të luhet më 3 qershor në Sydney.