Sulmuesi i krahut, Arbër Hoxha përfundimisht do të largohet nga Slaven Belupo në afatin kalimtar të janarit. Së fundmi, në garë për shërbimet e tij, janë futur edhe dy skuadra nga Serie A. Bëhet fjalë për Torinon dhe Monzan, ka njoftuar të martën mediumet kroate. Po ashtu, thuhet se situatën e Hoxhës po e monitoron edhe Ferencvarosi i Hungarisë.
Në fakt, thuhet se Torino dhe Monza tashmë kanë nisur kontaktet me Slaven Belupon, ekip që është i gatshëm të pranoj oferta deri në dy milionë euro për Hoxhën.
Ditë më parë, u raportua se Hoxha pritet ti bashkohet Dinamos së Zagrebit por ofertat e ekipeve nga Italia duket se kanë ndërruar mendjen e zyrtarëve të Slaven Belupos.
Te Slaven Belupo janë të bindur se Hoxha mund të jetë shitja rekorde e tyre duke pasur parasysh interesimin e madh për shërbimet e tij.
“Hoxha aktualisht është lojtari më i mirë i krahut të majtë në Kroacia. Realisht, është shumë larg më i miri. I ka të gjitha dhe kushdo që e merr nuk do të gaboj aspak”, ka pranuar trajneri i Slaven Belupos, Roy Ferençina. 25-vjeçari ka kontratë me Slaven Belupon deri në vitin 2027, ndërsa këtë edicion ka 5 gola e 3 asistime në 19 paraqitje në të gjitha garat.