Javier Aguirre si trajner i Mallorcas është rikthyer të prononcohet në lidhje me transferimin e Vedat Muriqit në ekip. Ai e quajti fat e kanë në skuadër një lojtar si ai.
Muriqi dje shkrepi edhe golin e gjashtë në La Liga. Ai është duke kaluar në formë jetësore. Te Mallorca të gjithë ndihen fatlumë që e kanë në radhët e veta.
Trajneri Aguirre sërish është pyetur rreth Muriqit dhe ai ka shpjeguar se si ka ndodhur transferimi i tij.
“Ardhja e Muriqit që besoj është çështje fati. Me Lazion kishim një opsion të blerjes, por nuk mund ta blinim për shkak të shifrave që kërkon. Club Brugge e pagoi atë çmim dhe lojtari nuk i kaloi testet mjekësore. Për këtë motiv Lazio zbriti çmimin për ne. Edhe pse mund të tingëllojë brutale kjo ndodhi, ne jemi të kënaqur dhe e duam shumë”, tha duke qeshur trajneri meksikan.
Pa Vedat Muriqin skuadra e Mallorcas ka pësuar dy humbje kur ai ishte i suspenduar gjatë muajit tetor. Skuadra pësoi humbje kundër Real Socieadit dhe Sevillas. Që prej kohës së rikthimit të sulmuesit dardan, janë rikthyer golat dhe rezultatet për ekipin ishullor.