Valter Mazzarri është emëruar sot si trajneri i ri i skuadrës së Napolit. Një rikthim pas një dekade për të në bankinën e të kaltërve, me të cilët përjetoi katër vite mjaft interesante në eksperiencën e parë.
Trajneri do të ketë dy javë kohë për të përgatitur ekipin që të rikthehet në nivelet më të larta e sidomos të fitoret e rëndësishme. Por kalendari me të cilin do të përballet, do të jetë i tmerrshëm, pasi në katër ndeshjet e para ka kundërshtarë shumë të fortë e që mund të ndikojnë edhe të një ndërprerje e shpejtë e marrëveshjes mes palëve nëse nuk regjistron rezultatet e duhura.
Pas përfundimit t8 pauzës së kombëtareve, Napoli do të udhëtojë për të luajtur në transfertë ndaj Atalantës më 25 nëntor. Më 29 nëntor e ka radhën Liga e Kampioneve, me një tjetër transfertë të tmerrshme në “Santiago Bernabeu” përballë Real Madrid të Ancelottit.
Ndeshja e parë e Mazzarrit në shtëpi është më 3 dhjetor, teksa përballë ka Interin, ndërsa më 8 dhjetor, luan përsëri në transfertë përballë Juventusit. Një start i frikshëm për çdo trajner, aq më shumë në një klub si Napoli ku presidenti De Laurentis kërkon medoemos rezultate të bujshme.