Trepça e ka fituar ndeshjen dramatike ndaj Rahovecit.
Të premten mbrëma në palestrën “Mizahir Isma” në Rahovec, mitrovicasit mposhtën “vreshtarët” me dy gola dallim, 37:35.
Ishte ballafaqim që i takoi xhiros së 20-të të Superligës A të hendbollit të Kosovës.
Ndeshja ishte e barabartë, ndërsa u vendos në minutat e fundit.
Pesë minuta para fundit, Trepça pati epërsi 34:30, por gaboi në disa aksione, ndërsa nga ana tjetër, Rahoveci i shfrytëzoi dhe e ngushtoi rezultatin në një gol, 34:33, por pa arritur që t’i barazonte shifrat.
Sali Maxhera realizoi golin e qetësisë. Ai kishte gjashtë gola në total, po aq sa Shpëtim Mehmeti, kurse golashënuesi më i mirë ishte Kushtrim Kastrati me shtatë gola.
Te vendësit, më i miri ishte Alban Haziri që pati dhjetë gola në total.
Trepça me këtë fitore mbetet në pozitën e dytë me 24 pikë, kurse Rahoveci ka 19 pikë në vendin e katërt.
Lidere është Besa Famgas me 33 pikë, me një ndeshje më pak të zhvilluar.