Florent Muslija pritet të largohet nga SC Freiburg gjatë kësaj vere, pas një sezoni me hapësira të kufizuara në Bundesligë. Mesfushori ofensiv i Kosovës tashmë ka marrë vendimin për të kërkuar një sfidë të re.
Sipas të përditshmes gjermane Kicker, për Muslijën ka interesim nga disa klube të Bundesliga II, por edhe nga jashtë Gjermanisë, përfshirë Superligën turke. Pa përmendur emra konkretë, Kicker nënvizon që futbollisti është në qendër të vëmendjes këtë verë.
Megjithatë, mediumi turk Fotospor shkon më tej, duke raportuar se dy klubet e sapo-promovuara në Superligën e Turqisë – Kocaelispor dhe Gençlerbirligi – janë të interesuara seriozisht për transferimin e Muslijës.
Sipas të njëjtit burim, Milot Rashica, lojtari i Besiktasit dhe bashkëlojtar i Muslijës te Kosova, po luan rol ndërmjetësues, duke e inkurajuar atë që të transferohet në Turqi.
Muslija iu bashkua Freiburgut nga Paderborni një vit e gjysmë më parë për 1 milion euro. Megjithatë, mungesa e minutave dhe ambientimi jo i plotë e kanë shtyrë lojtarin të shqyrtojë një largim të mundshëm.
Në sezonin e fundit, 26-vjeçari ka regjistruar 13 paraqitje në të gjitha garat me fanellën e Freiburgut, duke shënuar një gol dhe duke asistuar një herë.
Preferenca e tij mbetet qëndrimi në Gjermani, por interesimi nga Turqia është konkret dhe mund të ndikojë në të ardhmen e tij të afërt.