Ngjarjet e fundit në veri të vendit kanë ndikuar që Marijan Coric të pengohej nga i ati i tij që të mos rikthehej te Llapi. Një lajm të tillë e konfirmoi për Gazetën Nacionale vetë trajneri i klubit llapjan, Tahir Batatina.
Llapi kishte shfaqur interesim që ta rikthente në radhët e veta gardianin gjigant kroat, Marijan Coric. Megjithatë, ngjarjet e fundit në veri të vendit, me barrikadat që u ngritën nga strukturat paralele serbe dhe cenimi i sigurisë që u raportua gjithandej, ishin vendimtare që babai i portierit të ndërhynte dhe të mos e lënte që të rikthehej në Kosovë.
“Po, është e vërtetë. Coric ka pasur të kthehet te Llapi, mirëpo babai i tij s’e ka lejuar, sepse ai është djalë hastreti dhe kur i ka parë barrikadat e ngritur ka menduar se mund të ndodhë luftë në Kosovë”, ka thënë Batatina në një prononcim për Gazetën Nacionale.
Portieri 27-vjeçar sot njoftoi se ka kompletuar transferimin në një skuadër tjetër. Bëhet fjalë për NK Istra. “Falënderoj klubin për mundësinë” – ishte një koment i shkurtër i tij në “Facebook”.
Mirëseardhje atij i ofroi edhe NK Istra, duke njoftuar se me portierin Coric kanë nënshkruar kontratë deri më 2024.