Mesfushori Michal Sadilek nuk do udhëtojë me përfaqësuesen e Çekisë në kampionatin evropian “Gjermania 2024”.
Sadilek ka pësuar lëndim në këmbë pasi u rrëzua nga biçikleta në kampin stërvitor të ekipit në Schladming të Austrisë, ka raportuar të dielën “Reuters”.
Përzgjedhësi i Çekisë, Ivan Hashek është shprehur se mungesa e mesfushorit do të vërehet.
“Kjo është një mungesë e madhe për ne, sepse Michal është një nga lojtarët tanë me përvojë. Nuk ka qenë pa arsye që ka mbajtur shiritin e kapitenit gjatë ndeshjes kundër Maltës”, u shpreh Hashek.
Të premten, Sadilek ishte kapiten i Çekisë në fitoren 7:1 ndaj Maltës në ndeshjen
miqësore. Miqësoren e fundit para “Euro 2024”, Çekia do ta ketë të hënën ndaj Maqedonisë së Veriut.
Çekia në Evropian është në grupin F së bashku me Turqinë, Gjeorgjinë dhe Portugalinë.