Federata e Futbollit e Kosovës (FFK) ka marrë miratimin e UEFA-s për projektin që parasheh vendosjen e reflektorëve në të gjitha stadiumet e futbollit në vend. Lajmin e ka bërë të ditur kryetari i FFK-së, Agim Ademi, përmes një postimi në rrjetin social Facebook.
Sipas tij, vendimi është miratuar në mbledhjen e Komitetit UEFA Hat-Trick, e cila është zhvilluar në Kaunas, Lituani.
“Krenar që projektet e FFK-së po marrin mbështetjen e plotë të UEFA-s dhe që futbolli ynë po ecën drejt kushteve gjithnjë e më moderne. Bashkë për futbollin!”, ka shkruar Ademi.
Ky projekt pritet të përmirësojë ndjeshëm infrastrukturën sportive në Kosovë, duke mundësuar zhvillimin e ndeshjeve edhe në oraret e mbrëmjes dhe duke i dhënë futbollit kosovar kushte më të përshtatshme e moderne, në përputhje me standardet evropiane.