Ukraina ka konfirmuar se do t’i bashkohet Spanjës dhe Portugalisë në ofertën e tyre për të drejtat e organizimit të turneut të Kupës së Botës 2030.
Oferta vjen në mes të konfliktit shtatë mujor mes Ukrainës dhe Rusisë.
Plani është që Ukraina të presë një grup të plotë ndeshjesh të fazës së grupeve në Kupën e Botës 2030.
Presidenti i Shoqatës së Futbollit së Ukrainës, Andriy Pavelko, tha se zhvillimi i ndeshjeve të Kupës së Botës në Ukrainë është një ëndërr për miliona tifozë ukrainas.
“Ne jemi të lumtur që i bashkohemi ofertës evropiane për të pritur Kupën e Botës 2030. Ne e kuptojmë se sa e rëndësishme është kjo nismë sot për të gjithë Ukrainën. Kjo është ëndrra e miliona tifozëve ukrainas. Ëndrra e njerëzve që i mbijetuan tmerreve të luftës ose janë ende në territoret e pushtuara, mbi të cilat flamuri ukrainas me siguri do të valojë sërish së shpejti. Ne ringjallëm futbollin ukrainas në kushte lufte dhe kundër luftës. Lufta do të përfundojë dhe ne do të organizojmë ndeshjet e Botërorit 2030 së bashku me Spanjën dhe Portugalinë në nivelin më të lartë”, tha ai.
Të tre kombet do të duhet të presin deri në vitin 2024 për të marrë vesh nëse oferta e tyre për të pritur Kupën e Botës do të pranohet, raporton Goal.
Është e paqartë se çfarë do të bëjë FIFA nëse do të ketë ende konflikte të mëdha në Ukrainë, në kohën e përzgjedhjes së organizatorëve të Kupës së Botës 2030.
Spanja priti Kupën e Botës në vitin 1982 dhe të dy vendet iberike kanë aplikuar më parë për turnetë e viteve 2018 dhe 2022, por ishin të pasuksesshme.