Autoritetet turke urdhëruan autopsinë e trupit dhe konfiskuan telefonin për të gjurmuar personin me të cilin foli para vdekjes volejbollistja e vdekur në mënyrë tragjike Julia Ituma (18 vjeç), njoftojnë mediat italiane.
Një tragjedi e madhe tronditi dje sportin italian pasi u konfirmua lajmi për vdekjen e një prej volejbollisteve më të talentuara në botë, Julia Ituma (18).
Ituma luajti me ekipin e saj, Novarën, në Stamboll, ku rival në gjysmëfinale të Ligës së Kampionëve ishte Eczacibasi nga Turqia. Mirëpo, pak orë pas duelit më të rëndësishëm të karrierës së saj, mbërriti lajmi tronditës se ajo kishte vdekur pasi u rrëzua nga dritarja.
Shkaqet që çuan në rënien janë ende të paqarta, por pas pamjeve të kamerave dyshohet për vetëvrasje.
Siç shihet në video, pak para se të ndodhte incidenti, vajza ishte duke ecur në korridorin para dhomës së hotelit dhe duke folur në telefon, më pas u ul dhe qau, e në fund hyri në dhomë dhe më pas u gjet e vdekur përballë hotelit.
Mesa duket telefonatat në mes të natës e kanë shqetësuar dhe vdekja e Julias tronditi mbarë botën sportive, ndërsa shkaqet po hetohen nga autoritetet turke.
“Është çështje e saj private, ka qenë në telefon vonë natën. Duhet të ketë pasur telefonata të rëndësishme, por me kë nuk e dimë”, ka thënë menaxheri i saj.
Para se trupi i Julias të kthehet në Itali, autoritetet turke do të duhet të bëjnë autopsinë, e planifikuar për sot [e premte], ndërsa volejbollistes i është konfiskuar telefoni, që hetuesit shpresojnë të gjejnë përgjigje në pyetjet – kush ishte në telefon me Julian dhe pse u mërzit deri në atë masë sa shkoi drejt vdekjes.