(FOTO nga arkivi)
Pas një rekomandimi të lëshuar nga Ministria e Kulturës Rinisë dhe Sportit që refuzon të licencojë Federatën e Futbollit të Kosovës duke kërkuar dokumente shtesë si dhe kërcënimi që t’u ndalojë klubeve Ligjin për Sponsorizim, ka bërë që sot të organizohen klubet e njohura si opozitë e FFK-së.
GazetaSport.ino mëson se ato kishin lënë një takim në qendër të Prishtinës, por duket se ftesën e tyre e kanë refuzuar shumica e skuadrave nga Superliga. Tahir Batatina i Llapit edhe hapur doli dhe refuzoi të takohet duke thënë se ka kaluar koha e takimeve nëpër kafene, tash klubet e kanë shtëpinë e tyre FFK-në dhe aty duhet takuar dhe sqaruar gjithçka.
Në këtë takim siç merr vesh GazetaSport.info prezentë kanë qenë vetëm klubi i Prishtinës me Remzi Ejupin, Trepça ’89 me Abedin Zekën, Drita me Valon Zymberin dhe Drenica, klube këto tashmë të njohura në opinion se janë kundër FFK-së, gjë të cilën e kishin bërë edhe në kohën e zgjedhjeve.
Çuditërisht aty kanë qenë edhe Eroll Salihu, Arianit Ahmeti e Gramoz Vokrri që nuk përfaqësojnë asnjë skuadër.
Klubet e futbollit të Kosovës në të gjitha rangjet, tashmë e kanë të qartë se Komisioni Vlerësues i MKRS-së është i njëanshëm dhe me qellim ka krijuar huti për të ngritur tensione tek klubet. Gjithsesi, sipas klubeve elitare licencimi është i pashmangshëm, ndryshe nga UEFA e FIFA do të cilësohet si ndërhyrje në punët e FFK-së. /GazetaSport.info