Mërgim Vojvoda ka treguar shumëçka rreth karrierës së tij. Ndër të tjera ka treguar edhe për vendimin për ta përfaqësuar Kosovën.
Mbrojtësi i Comos kishte vendosur t’i bashkohej Kosovës në vitin 2017, pasi kishte luajtur 12 ndeshje për U21 të Shqipërisë, nga viti 2014 deri në vitin 2016. Për Shpresat e Shqipërisë i luajti shtatë ndeshje kualifikuese dhe pesë ndeshje miqësore.
Për Kosovën A i ka zhvilluar 63 ndeshje, një më pak se kapiteni Amir Rrahmani që mban rekordin për më së shumti paraqitje.
Vojvoda 30-vjeçar është krenar me vendimin që mori për t’iu bashkuar “Dardanëve”.
“Kam filluar me ekipin e Shqipërisë U21 në moshën 19-vjeçare, më pas kur Kosova u njoh nga FIFA, vendosa të ndryshoja dhe të luaja për Kosovën. Jam shumë krenar që përfaqësoj vendin tim. Sot jam lojtari i dytë me më së shumti paraqitje te Kosova”, ka thënë mbrojtësi i krahut, Vojvoda, në një intervistë për faqen e klubit italian.
Me fanellën e Kosovës, Vojvoda ka shënuar dy gola. Ai luan në pozitën e mbrojtësit të krahut të djathtë. Shpesh është aktivizuar edhe në pozitën e mbrojtësit të krahut të majtë. Në fillim ka luajtur edhe si qendërmbrojtës.
“Me kalimin e kohës kam zhvilluar këtë stil të veçantë loje, duke bërë lëvizje që zakonisht nuk janë tipike për një qendërmbrojtës. Gjatë zhvillimit tim kam pasur më shumë përgjegjësi dhe kam mësuar të jem më i vetëdijshëm për atë që duhet të bëj”, ka theksuar Vojvoda.
Ai zbulon se Ronaldinho mbetet lojtari më i pëlqyer. Thotë se Chelsea dhe Barcelona janë dy prej skuadrave që i kanë pëlqyer për mënyrën e lojës.
“Ai më bëri të dashurohem me sportin. Është unik”, ka theksuar Vojvoda për superyllin brazilian.
Në edicionin aktual Vojvoda ka luajtur 20 ndeshje në Serie A. Tri prej 20 ndeshjeve i ka me fanellën e Comos, ndërsa të tjerat me skuadrën e Torinos.
Comos iu bashkua në muajin shkurt. Como zë vendin e 13-të me 30 pikë.
“Në afat të shkurtër, qëllimi ynë kryesor është të qëndrojmë në Serie A. Është synim kryesor, sepse vitin e kaluar ishim në Serie B. Qëndrimi në Serie A është me të vërtetë i rëndësishëm për të fituar besim dhe për të ndërtuar diçka solide. Përveç kësaj, me Comon duam të arrijmë diçka të jashtëzakonshme, diçka të papritur. Ne lojtarët jemi të vetëdijshëm se cilat janë objektivat”, ka thënë Vojvoda.